Azərbaycanda yeni “Alpinizm Federasiyası” ictimai birliyi təsis edildi. Federasiyanın ilk prezidenti tibb elmləri doktoru, alpinizm üzrə təlimatçı Nəcməddin Hacıyev seçildi. Onun rəhbərlik etdiyi dövrdə federasiya yeni təlimatçıların yetişdirilməsinə daha çox üstünlük verirdi. N.Hacıyevin rəhbərliyi ilə hündür dağlara ilk ekspedisiyalar təşkil olunmağa başladı.

1972-ci ildə A. Voskresenskiy, Q. Mironov və E. Cəfərov “Kommunizm”(7495 m.) pikini fəth etdilər.

1974-cü ildə azərbaycanlı alpinistlər Y. Qorin, Y. Karumidze, Q. Mironov, Litvinov, V. Sereda Qafqazın “Şxelda” massivinin traversini etdilər və nəticədə “Spartak”ın təşkil etdiyi yarışmanın bürünc medallarını qazandılar. Qadın idmançılarımız arasında aparıcı alpinistlər Emma Orucəliyeva (bir müddət öncə o “Lenin” (7134 m.) pikini fəth edib) və Elena Məmmədbəyova idi.

1988-ci ildə alpinizm üzrə baş təlimatçı, texniki elmlər namizədi Rasim Cəfərov Federasiyaya rəhbərlik edirdi. 80-ci illərdə alpinizmin sıralarına Elçin Məmmədov, Elman Rəhimov, Oleq Jarkov, Eldar Hüseynov layıqli idmançılar cəlb olundu. Federasiya öz fəaliyyətini SSRİ dağılana gədər davam etdirdi.

Respublikamız müstəqillik əldə etdikdən sonra 90-cı illərdə dağ turizmindən qayayadırmanmaya və alpinizmə Yaqub Məmmədov, Dmitriy Şiyanov və Akif Rüstəmov kimi idmançılar keçirlər. Federasiya üçün növbəti çətin dövr keçən əsrin 90-cı illərə təsadüf edir. Lakin ölkədə çətin iqtisadi vəziyyətə baxmayaraq Federasiya parçalanmadı. Azərbaycan Respublikasının qanunvericiliyinə uyğun olaraq 25 oktyabr, 1997-ci ildə Alpinizm Federasiyası nizamnaməsini rəsmi qeydiyyatdan keçirdi və “Azərbaycan Alpinizm Federasiyası” (AAF) adlanmağa başladı.

2000-ci ildə ilk dəfə Elçin Məmmədov Xan-Tenqri zirvəsinə qalxıb.

2001 – 2007-ci illər arasında dünyanın ən hündür zirvələri fəth edilir: Kilimancaro (5895 m.) Afrika – İsrafil Aşurlı – 2001-ci il;

Kostyuşka (2228 m) Avstraliya – İsrafil Aşurlı – 2002-ci il;

2003-cü ildə alpinistlərimiz Qırğızıstan dağlarında “kəşfiyyat” aparırlar və növbəti il 5025 m. hündürlükdə yerləşən əvvəllər fəth edilməyən adsız zirvəyə “Azərbaycan” adını verirlər. Elbrus (5642 m.) Avropa – İsrafil Aşurlı – 2003-cü il;

Akonkaqua (6962 m.) Cənubi Amerika – İsrafil Aşurlı – 2004-cü il;

Mak-Kinli (Denali-6194 m.) Şimali Amerika – İsrafil Aşurlı və Faiq Mursaqulov – 2005-ci il; Vinson massivi (4892 m.) Antarktida – İsrafil Aşurlı – 2005-ci il.

19 may, 2007-ci ildə Azərbaycanın tarixində ilk dəfə olaraq İsrafil Aşurlı dünyanın ən hündür zirvəsini – Comolunqmanı (8848 m.) fəth edir.2007-ci ildə Akif Rüstəmov və İsmayıl Əsgərov “Korjenevskaya” və “Kommunizm” zirvələrinə uğurlu dırmanmanı edirlər.2007-ci ildə İFSC-nin (Beynəlxalq İdman Dırmanması Federasiyası) UİAA-dan (Beynəlxalq Buzadırmanma Assosiasiyası) ayrılmasına baxmayaraq, Azərbaycan Alpinizm Federasiyası hər iki idman növünü uğurla inkişaf etdirir.

2009-cu ildə İsrafil Aşurlı “Xan Tenqri” və “Qələbə” zirvələrini fəth edir. Elə həmin il o, Azərbaycan tarixində daha bir ilkə imza atır - ölkəmizə “Qar bəbiri” titulunu gətirir. Uzun illər azərbaycanlı alpinistlər Türkiyənin, İranın, Fransanın, Çexiyanın və Yunanıstanın ən hündür zirvələrini uğurla fəth edirlər. 2009-cu ildə AAF MDB ölkələri arasında alpinizm üzrə sammitdə iştirak edir. Sözügedən sammit MDB ölkələrinin alpinizm federasiyaları arasında bu idmanın inkişafına yeni təkan verib.

2000–2010-cu illər arasında Azərbaycan Alpinizm Federasiyasına Rasim Paşa oğlu Cəfərov rəhbərlik edir.2010-cu ildən etibarən alpinistlərimiz hündür dağlara qayıdırlar. 2010-cu ildə AAF-ın prezidenti İsrafil Aşurlı seçilib. E. Məmmədov, İ. Aşurlı, İ. Əsgərov, S. Məmmədov müxtəlif illərdə “Pamir” və “Tyan-Şan” dağ sistemlərinin ən hündür zirvələrini fəth edirlər: “Lenin” piki, “Xan-Tenqri” piki, “Korjenevski” piki və “Qələbə” pikləri.

2011-ci ildə İsrafil Aşurlı Kançencanqa zirvəsini fəth etmişdir.

Yalnız 2013-cü ildə Azərbaycan Alpinistləri Pamirin üç 7000-lik dağlarını 2 həftə ərzində fəth etmişdirlər.

9 sentyabr 2022-ci ildə Ekologiya və təbii sərvətlər naziri Muxtar Babayev federasiyanın prezidenti seçilib. Səyyarə Məmmədova federasiyanın vitse-prezidenti, Dilarə Cəfərova, Rinat Rəhimxanov və Abuzər Ağazadə İdarə Heyətinə üzv seçiliblər.